هو كدا احسن والا الاول؟؟؟
يعني التقدم الرهيب في مجال الاتصالات دا حاجة كويسة والا زمان كان احسن؟؟
اي نعم نسبة مبيعات المناديل انخفضت عشان خلاص معدش في حد بقي بيعيط كتير لما حبيبه أو قريبه يسيبه ويسافر....عشان بقي ممكن يشوفوا وشه كل يوم في اي وقت صوت وصورة علي النت....
طيب هو زمان لما كان الواحد بيسافر ويغيب بالشهور والسنين واهله كانوا بيتشحتفوا علي جواب منه ...كان احسن والا دلوقوتي
زمان كان اللي عاوز يعمل بحث كان بيلف يا ولداه علي مكاتب ويدور في مراجع لغاية ما شعره يبيض ونظره يضعف
دلوقتي بقي في دقايق معدودة ممكن توصل للي انت عاوزه وانت قاعد في مكانك وبتشرب كوباية نسكافيه وقاعد تحت التكييف
طيب هو كان الاول احسن لما ادور انا علي المعلومة بنفسي واجري وراها والا دلوقتي لما ادوس علي الزرار القيها ادامي؟؟
حتي الحب النص كم.................
الغريب والمثير في الحكاية ان زمان كان الحبيبة بيقعدوا علي الكورنيش ويخرجوا في الجناين ويجيبوا لبعض ورد .....ربنا ينتقم منهم كلهم
دلوقتي بقوا بيحبوا بعض وهما ادام الاجهزة وبيبعتوا لبعض ورد برضو وهما ادام الاجهزة علي برامج المحادثة ...وتسمع عنهم قصص كتيرة في الخيانة وفي الاخلاص وفي الوفاء وفي البتنجان والكوسة ...كل دا ادام اجهزة الكمبيوتر .....وطبعا بالنسبلهم الحكاية احسن واسهل عشان خاطر الطراطير (الاب والام) مش عارفين ولا فاهمين حاجة
طيب هما دلوقتي احقر من الاول والا الاول كان احقر؟؟؟
انتم عارفين ان دلوقتي كمان بقي في مظاهرات وحركات ثورية علي النت....يعني تلاقي الشاب يا حبة عين امه سايب اللي وراه واللي ادامه واللي جانبه ونازل شتيمة وعمال يقول في شعارات وكلام يخلي الواحد يعيط من الوطنية
طب زمان كان الناس بتاعت المظاهرات بتاعت سعد سعد يحيا سعد ....كانوا لابسين طرابيش ومشايين شايلين واحد صاحبهم وبيهتفوا عشان سعد يرجع تاني...
سعد مين ويرجع منين انا معرفش
بس اللي اعرفه ان كان في واحد بتاع وطنية زمان بيقول مفيش فايدة علي طول ومربي شنبه وشكله يقرف بصراحة يعني.....في الاخر عرفنا انه كان عميل للانجليز
طيب كان زمان احسن والا دلوقتي.....
يعني ايام مظارهات الطرابيش احسن والا مظاهرات السلسلة واللبانة والمياعة والفرفرة
انا من رأيي الشخصي انهم كلهم ملهمش لزمة وبيضحكوني في الحالتين
الخلاصة يا شباب اني مش عارف زمن الحمام الزاجل كان احسن والا زمن الDSL????
ما علينا
اهو كلام والسلام