مش كلام والسلام: ثلاث ثوان مع شمعة...

السلام عليكم.......

اخي في الله..........................

تخيل معي شمعة مسلطة علي جسدك لمدة سنة...هل تتحملها....لتكن هذه الشمعة مسلطة علي جسدك لمدة شهر...ما رأيك؟؟

أخي في الله هل تتحمل شمعة تحرق جسدك لمدة إسبوع متواصل ليل نهار؟؟؟

لالالا...ليس إسبوع....بل إنه يوما واحدا فقط....شمعة تحرق جسدك يوما واحداً فقط...هل تتخيل الألم ...آلم الاحتراق لمدة يوم؟؟؟

فلنجعل هذه الشمعة تحرق جسدك لمدة ساعة متواصلة...هل تتحمل ساعة بلهب هذه الشمعة؟؟

لنكن رحماء ونقول انها دقيقة واحدة فقط....ستون ثانية...بالله عليكم هل تتحملونها؟؟؟

ما أكثرها من ثوانٍ في عذاب الشمعة المحرقة

اليكم التجربة....أشعل شمعة وضع إصبعك عليها لمدة ثلاث ثواني فقط....

ثلاث ثوان فقط (جرب بنفسك)

هل تقدرون؟؟؟ هل تتحملون لهب الشمعة ثلاث ثوانٍ فقط

إنها ليست سنة ولا شهر ولا اسبوع ولا يوم ولا دقيقة...إنها ثلاث ثوان فقط

فما بالك بمن يعذب في نار اشد من النار التي تصهر الحديد بسبعين مرة الي ماشاء الله.....

هل أفزعك الامر ؟؟؟

هل تريد ان تعرف اكثر وتقرأ ما هو مكتوب.....الموضوع هذه المرة طويل إصبر نفسك علي متابعته

معذرة احبتي في الله...هذا الموضوع سوف اصيغه لكم باللغة العامية التي لا أود ان اكتب بها....وإذا قدر الله لنا البقاء سوف يكون موضوعنا القادم في سلسلة (فطوبي للغرباء ) عن اللغة العربية وضياعها من بين ايدينا

نبدأ بالحوار التالي بين شاب ملتزم وبين سائق تاكسي :

الشاب الملتزم : السلام عليكم

لو سمحت أقفل الكاسيت بعد إذنك.....

سائق التاكسي : نعم يا استاذ!!!!!!....عاوز ايه....؟؟؟؟؟؟!!!!!!

الشاب الملتزم :بقول لحضرتك اقفل الكاسيت لو سمحت

سائق التاكسي : ليه إن شاء الله....عشان ايه يعني اقفل الكاسيت

الشاب الملتزم : عشان انا مش عاوز اسمع اغاني...بعد إذنك يعني....

سائق التاكسي : هي العربية بتاعتك والا بتعتي...؟؟

الشاب الملتزم بإبتسامة ودودة : العربية بتاعتك وكل حاجة يا عم وربنا يبارك لك فيها

بس وداني هي اللي مش بتعتك....يعني متسمعنيش حاجة غصب عني...لو عندك قرآن ياريت هيبقي حاجة جميلة وتاخد ثواب جميل اوي ...او حتي خطبة جميلة تشد الناس ونطلع منها بعظة......

سائق التاكسي : انا معنديش غير اغاني و بقولك ايه بقي عشان الواحد مش ناقص وجع دماغ دي عربيتي وانا حر اشغل اللي انا عاوزه واللي مش عاجبه يتفضل ينزل...احنا مش بنضرب حد علي ايده ونركبه بالعافية......هتشترونا بقي بالملاليم اللي بتدفعوها

بعد ما الحوار وصل لطريق مسدود يقول الشاب الملتزم : طيب اتفضل اجرتك ونزلني علي يمينك لو سمحت

دا الحوار اللي دار بين شاب ملتزم وبين راكب تاكسي مهذب ومحترم

طبعاً بعد حذف الرقابة وقطع حجات منه

لالالا...مترحوش لبعيد وتفتكروا انه كان بيكلم الراجل بطريقة وحشة او مستفزة زي ما بيصوروا في افلام عادل أمام...والله بإبتسامة وأدب وذوق...دا فن من فنون الدعوة الي الله عز وجل...

الحوار التاني اتنين صحاب مسافرين مع بعض...واحد روش والتاني ملتزم

شاب روش : بقولك ايه انا هرمي نفسي علي الكرسي واعيش مع الMP3

شاب ملتزم : بكل سذاجة..انت حاطط عليه ايه....يعني سمعنا معاك يا عم بدل الملل والسكة طويلة

الروش: دا أنا مظبطه علي الاخر...هتلاقي كل اللي نفسك فيه يا ريس

بس قولي انت ليك في (..........)قعد يقول كلام غريب واسامي ناس غريبة اوي

الملتزم : حس بالحرج والجهل....برضو بكل سذاجة قال : هما مين دوله؟؟؟

الروش:بص شوية كدا وكأنه بيكتشف نوايا الاخ الملتزم وهل هو (بيشتغله) والا صحيح هومش عارف مين دوله

وقال امال انت بتسمع ايه...؟؟

الملتزم : برضو بكل سذاجة....يعني بحب اسمع الشيخ محمد حسين يعقوب وبحب الشيخ محمد حسان والشيخ محمود المصري في الدروس....وبحب بقي أسمع القرآن من الشيخ السديس والشريم....وبرضو مشاري

الروش : سكت كدا شوية وبص بصه ولسان حاله فيها....هو انت منهم

رد علي الاخ الملتزم وقاله لا للأسف انا معنديش ...بس إن شاء الله هبقي احط الحجات ديه...انا والله كويس وبصلي...بس هو الاغاني يعني فيها ايه؟؟؟

نيجي بقي لموضعنا احنا ونتكلم مع بعض بقي ونفضفض ونقول اللي في نفسنا...بس من غير ما نقطع شعر بعض ونخربش وش بعض

نمسك الحوار الاول بتاع سواق التاكسي...؟؟

هو فعلا من حق اي حد راكب تاكسي انه يقول للسواق اطفي الكاسيت او متشغلش اغاني

ايوة من حقه طبعا.......بقول طبعاً

امال من حق السواق انه يسمعه الاغاني ؟؟

بس ديه عربية السواق مش عربية الراكب......

الكلام دا لو عربية ملاكي مش تاكسي اجره....هو شغله انه يركب الناس وياخد منهم فلوس....

لو واحد كدا ربنا فتح عليه وطلب ليموزين بالسواق...شوف المعاملة بتبقي عاملة ازي

شوية والسواق ينزل ينفضلك هدومك ويشيلك الشنطة

مش قصدي ان سواق التاكسي شغال عندي....وانا بقي ارفع مناخيري واتكبر علي خلق الله....معاذ الله...إن الله لا يحب من كان مختالا فخورا

قصدي انا انا ليا الحق اني اطلب اني مسمعش اغاني...وبطلب الحق دا بكل ذوق وكل ادب وببتسامة لطيفة جداً....

نيجي الحوار التاني بقي :

طبعا هو حوار دار بكل ادب ومفيش عليه اي تعليق غير علي الجزء الاخير من الحوار

وهو قول الاخ الروش:

هو الاغاني حرام يعني

ايوة يا جماعة الاغاني حرام

مش هقول ادلة من الكتاب والسنة عشان كلنا عارفينها

ومش هقول رأي الائمة الاربعة ورأي علماء الاسلام في الغناء والمعازف

ايه يا عم صابر...انت هتزعل الناس ليه منك....الناس رايقين علي الاخر وكله بيسمع اغاني

دا حتي مرة المفتي (مش بتاع دلوقتي ) قال انه لا مانع من سماع بعض الموسيقي الهادئة وانا عن نفسي بسمع فيروز

دا قول مفتي الحكومة...يعني راجل موظف في الحكومة....واظن يعني انتي عارفين ان احنا حكومتنا حكومة مش نظيفة...مع إن رئيس الحكومة اسمه نظيف

والشباب الحلويين بتوع المظاهرات والمدونات الثورية و(عاوزين حقنا) ضد الحكومة في كل حاجة...إشمعني بقي الحكومة بقت حلوة لما حللت الحرام؟؟؟

نرجع ونقول في بعض الناس اللي في مناصب الدين في الدولة امثال المفتي وشيخ الازهر محدش ياخد علي كلامهم

طبعا انا مش هعيب ولا هشتم ولا حاجة

بس هقول حسبي الله ونعم الوكيل في شيخ الازهر سيد طنطاوي وفي المفتي علي جمعة وكل من سار علي دربهم وأضل الناس وهو علي علم

انتم عارفين ان في اغاني فيها كلام يخرج من الملّة؟؟

يا خبر ابيض...اغاني كلمها كفر

والله العظيم كلمها كفر...تعالوا احكموا بنفسكم

تغنت فيروز (اللي بيحبها المفتي) بأغنية اسمها اعطني الناي وغني

اعطني الناي وغني....فالغني سر الوجود

وانين الناي يبقي...يعد ان يفني الوجود

يا سلام علي الاحساس....بقي الناي هو سر الوجود....يعني سر خلق الانسان وسر خلق السماوات والارض....

وبعدين بعد ما القيامة تقوم وينفخ إسرافيل في الصوَّر والناس كلها تموت الناي هيفضل يغني

بس..لا تعليق

وقبلها كان قول عبد الحليم : قدر احمق الخطي

وقبلها كان جئت من اين ولا أعلم من حيث أتيت

مصايب سودا

والله مصايب سودا وما خفي كان اعظم

يا شباب....والله انا عارف إن الكلام تقيل علي كثير مننا...بس الموضوع مش سهل....الموضوع جنة ونار....

ايوة والله الذي لا اله الا هو الموضوع جنة او نار

معقولة الاغاني هتدخل الجنة؟؟

اصل كل حاجة هتيجي في الاخرة وتروح مكان من الاتنين...إما جنة وإما نار

بالله عليكم....الاغاني مكنها فين؟؟؟

اصل الاغاني مش هتدخل من نفس الباب اللي هيدخل منه القرآن الكريم

اسمع لقول ربك عز وجل:

"فريق في الجنة وفريق في السعير"

نعم والله...فريق في الجنة وفريق في السعير

إن كنت ممن لوثوا آذانهم بسماع كلام الشيطان فصرختي اليك....إحذر ان تقبض وانت علي هذه الحالة....وتزكر الشمعة

قولوا سبحانك اللهم وبحمدك...أشهد الا اله الا انت..استغفرك واتول اليك

رجاء الي الاخوة والاخوات الذين يضيفون الاغاني والموسيقي الي مدوناتهم إن يتقوا الله ويتنبهوا إن هناك من يضيف قرآن وادعية....وعند فتح صفحاتهم يختلط صوت الاغاني بصوت القرآن وبهذا همّ يصدون عن سبيل الله دون ان يعلموا

ارجو الانتباه...ليس الامر بالحرية الشخصية

وجزاكم الله خيراً