مش كلام والسلام: الخِلّ الوفي (بكسر الخاء)

السلام عليكم

ازيكم يا شباب.....مخنوق ومتعكنن وعاوز افضفض في موضوع قرفني اوي

موضوع الصحوبية

موضوع قرفني بجد وخلاني بقيت متقوقع علي نفسي ومش عاوز اكلم حد

اه طبعا الموضوع مش سهل ولا بسيط

لما اتنين يتكلموا وواحد يقول للتاني حاجة مستحيل تحصل يقولوا دي حاجة من رابع المستحيلات

عارفين ايه هما المستحيلات الثلاثة....

ايوة الله ينور عليكم

المستحيلات الثلاثة هما الغول والعنقاء والخِلّ الوفي

طبعا الغول دا حيوان او مخلوق خرافي...والعنقاء هي زوجة الغول (لازم تبقي مش موجودة)

اما الخِلّ الوفي فهو الصديق المخلص الوفي

ودا في هذا الزمن يندر وجوده ...ايوة كان زمان موجود والله.....وأكبر مثال علي كدا صدّيق الامة سيدنا ابو بكر رضي الله عنه وأرضاه....والصحابة جميعاً

دلوقتي حتي العلاقة بقت فاترة

ممكن واحد يقولك : اني احبك في الله ...وتصرفاته غير كدا خالص....

ماشي... ممكن يكون حسن النية وكل حاجة....بس مش ديما القلوب هتبقي صافية عشان تحمل اخطاء الغير علي حسن النية

اكيد في ضغائن لازم هتحصل بين الاخوة

عارفين ايام اعدادي وثانوي كانت العلاقة جميلة جدا وقوية اوي.....كنا ممكن نقطع هدوم بعض ونتخانق ونشلفط بعض...بس بنرجع صحاب زي الاول واحسن....نضرب بعض ونشتم بعض...بس تاني يوم ناخد بعض بالحضن وننسي اللي حصل في ثانية

عشان كدا انا ديما لما بفتكر حاجة حلوة برجع لأيام زمان

التليفون مكنش بيبطل رنّ....مكنتش بقعد في البيت...لو عدي نص يوم من غير ما اشوف صحابي أو اخرج معاهم...او حتي اتخانق معاهم كان ممكن تجيلي سكتة قلبية واموت من الاكتئاب

دلوقتي ممكن اسمع ان واحد صاحبي اتجوز مثلا بقاله سنة

واحد تاني سافربره مصر ورجع وسافر ورجع وانا معرفش عنه حاجة

واحد تاني ممكن يموت....واعرف بالصدفة

ولما نفسك تهفك بقي وتقول انا هتصل بفلان اسلم عليه...دا واحشني اوي

تلاقيه مستغرب اوي اتصالك....وفرحان جدا انك بتكلمه....وكل المكالمة عبارات مجاملة باردة كأنك واحد زميله في الشغل ومكنتوش زمان بتكلوا وتشربوا مع بعض وتسهروا تزكروا مع بعض.....زمان كان نص الاتصال تريقة وشتيمة

صح كان اسلوب مش محترم بس بيني وبينكم...كان جميل وكله ودّ

ويا سلام بقي لما تسال علي فلان وتقوله انت مش بتسال ليه يا عم فلان

يتني ويتفرد ويبصلك ويبرق عنيه ويقولك:

يا عم انا رنيت عليك الشهر اللي فات وانت مردتش عليا الرنة!!!!

بقي بذمتكم واحد طويل وعريض زي الشحط لسا بيرن وبيدي ميسدات؟؟

يعني مستخسر فيك ربع جنيه أو 30 قرش ثمن دقيقة موبيل.....

لا وكمان بيعاتب وبيقول انك مردتش عليه الرنة

طبعا انا لازم مردش ولا حتي اتصل....إذا كان مقامي عند حضرتك لسا موصلش انه يبقي ربع جنيه يبقي عاوزني اعاملك ازاي؟؟

طيب احنا في ثانوي كنا عيال (والله يا ريتها دامت وفضلنا عيال)..

طيب في الجامعة اللي هي المفروض النضوج الفكري والعقلي واكتمال الشخصيات

(كلمتين اونطة بس لازم اقولهم)

كنت في جامعة بعيدة عن بلدي.....عرفت ناس كتير اوي من كل البلاد...وطبعا كل واحد كان سفير لبلده زي ما بيقولوا...والحنين ديما كان بيرميك علي ابن بلدك وحبيبك اللي كان معاك في المدرسة

اكيد هتقضي معاه ايام مهما كانت صعبة وشاقة بس جميلة وفيها حجات حلوة متتنسيش

طيب بعد ما الجامعة خلصت وكل واحد راح لحاله....ايه اللي حصل؟؟

بلاش.....خليني ساكت احسن.....

اهو الواحد اتعلم كتير اوي الفترة اللي فاتت.....الدنيا احقر من ان الواحد يدور فيها علي حاجة حلوة

ايوة المحبة في الله موجودة ....ولازم ندور عليها ونطبقها

لازم تحب اصدقائك في الله...

ما كان لله دام واتصل وما كان لغير الله انقطع وانفصل

أدعوا الله ان يرزقني انا ومن احبه في الله الجنة حتي نكون علي سرر متقابلين

هناك الكمال والحب اللي بندور كلنا عليه

يقول الله عز وجل في كتابه الكريم

(ونزعنَا مَا فِي صدُورِهمْ مِنْ غِلّ اخوَانا على سُررٍ مُتقَابلِينْ)"..

علي فكرة انا بحب صحابي كلهم ....ومش زعلان منهم ومش هزعل ابدا

بس الدنيا مشاغل....وانا كمان مقصر في حقهم ويمكن اكون انا اللي غلطان

صدعتكم ووجعت دماغكم....

بس مش عارف ليه استريحت اوي بعد ما كتبت التوبيك دا

تصدقوا فعلا المدونة طلع ليها فايدة.....